نتيجة العراق

ادرس ياوطن اني امتحنتك ليش


المفروض منك تاخذ انت اعفاء


ناجح مدري راسب مدري طحت اكمال


مجموعك شعب شيجمعه صار اجزاء



اقرالك درجتك كلها بالتفصيل ؟


وانطيك النتيجه تفرح وتستاء


خذت باللغة مية عالعروبة البيك



وصفر كل العرب من الالف للياء


لان كلك قواعد ياوطن مملوء


صرت اشطر بلد عمي انت بالملاء



ولهذا السبب كسلان بالاعراب


ولهذا السبب ليهسه ماكو انشاء



امريكا واختها ايرفعن الخيرات


وينصبن قواعد ترسن البيداء


وفعل ناقص تعربه وشعبك المسكين


مفعول به بل حتى بالأباء



والفاعل تعرفه وتبني للمجهول


تحالف مستتر تقديرهم اعداء




وبغداد واختها اعربهن بيا حال


مكسورات خاطر هي والحدباء


واكسل بلد انت بالرياضيات


يحكمونك جبر وتكول استفتاء


واحنا بدائره وطول المحيط اذياب


والمركز عميل ونص قطرنا اعداء


مثلث سني جنه وشيعي متحدين


كسرت اضلوعنه وما مكتفي بما جاء


اضربتنه وقسمتنه ونقصتنه اهواي



وبعد ما ننجمع حاصل جمعنا اشلاء


وباوعت اعله شعبك شفته كله اموات


وانطيتك صفر ياوطن بالاحياء


وعفيتك بالزراعه وهسه اكلك ليش


لان صارت فحم كل ارضك الخضراء


ولان اكثر بلد بي تنزرع عبوات


اسئلة الزراعة اتحلها بالكيمياء


ودرجتك مو صفر مية الصفر بالدين


بيك حسين ميت والطغاة احياء





وبيك العسكري ومحد يزوره بطيف


مسجون بحضرته ولاسقف جرداء


وخيرك ينسرق سراقه معروفين


حتى الاعمى سأله يكلي هولاء


ولا فتوة اسمعت من كل رجال الدين


وسماك من العمايم تنفرش سوداء




حسرتنه على حقنا وحقك المسلوب


ابكبر حسرة فتك عند فاطمه الزهراء


لازم يا عراق اتعيد بالتاريخ


اكتب من جديد وامسح الاخطاء


وعوف الجامعه ومن عمرو موسى ارتاح


وامسح كل حرف بيه اوهم الابناء


وامسح كل بلد ضم راسه وكت الضيج


وامسح كل رئيس ودولته الخرساء


واكتب مو عرب كلهم مسخ للضاد


كلهم مو بزر بطن امتي السمراء


بس انه الابن بس انه روح اللاه


بس انه اطلعت من مريم العذراء