علي الملا الخزاعي : مدرسة الكرم

كريم وبالكرم مثلك جذب موجود

وحاتم مدرسه بس انته مدرسته

اسطوره ومن اقارن مايقارن بيك

مولاي الحسن بالحسن قارنته

واحد بالكرم محد يشبهك دوم

شي مدروس هذا وكلهه فاهمته

صعب ماتنحزر كلك لغز مولاي

وبسيف الصبر كل صنم هدمته

كل مرسل يجي معروف عنده اعجاز

نشوف المعجزات بعظم منزلته

ومعجزتك مظيفك يامظيف الكون

مااعتقد غيرك هاي معجزته

يالمشبع الجاع وكارم الماجاع

والماجاع بس اخلاق شبعته

وموبس هاي عندك بالكرم مولاي

الجايع عالشبع يالحسن فلته

الخايف من يجيك ايامن اعله الباب

لان بابك الجنه ايشوف شابكته

اسمك يالحسن بالمعنه يعني احسان

جي احبك اكولن انه فسرته

لائنك مو سهل تتفسر ابهالحال

لغز كل البشر بالعقل شايلته

امس من هدموك ورادوا ايطيحوك

ويروح الكرم وتروح سالفته

وكفت الوحدك واكبالك انته اجيوش

وبدمك الطاهر كمت شيدته

مدينه وماترد كلمن يمر اعليك

وكلبك لليتامه اسنين شرعته

ماخايف امس بس حكمه جانت هاي

وجيوش اشكثر ذابحه بالسكته

لان شفت الخلافه اتاثر اعله الدين

سلمت الخلافه الكرم ماعفته

يالمعزب المنايا التفر منها الناس

اجه السم اعله ابابك وانته وجبته

وملك الموت اجاك ومستحي امن الموت

تلكيته وحظنته وكمت عزبته

فرشت السفره عمرك شفته بعد ايريد

روحك قدمته المهم شبعته

ونعشك من متت موبس بشر شالوه

ملائكة الجليل النعش شايلته

وبيبان المايف شالتك عالراس

ومظيفك يالحسن شيسدهه فاجعته

سد بيبان كلبه وراح يم احسين

يسال بالحسين الحسن ماشفته!!

الدلال اخلاف عينك ماتريد اوجاغ

نار افراك هجرك هيه شاعلته

اعترض كلشي اعله مودك من رحت مولاي

الكرم عاف الكرم من يوم ماعفته!