رئيس الفقراء علي بن ابي طالب ع

كل سلطان ضده اتصير الكلوب

وعلي سلطان بي مجنونه الكلوب

قائد تحت امره الدنيه والناس

الشمس رجعهه مافك حلكه الغروب

علي الماعاف ثوبه ايعوفنه اشلون

امس ركع الثوب الخاطر الثوب

رئيس وجيبه خالي اشلونك ابهاي

وموبس هاي حيدر شال الجيوب

علي ابرقة دمع عين المراجيح

ترف بس بالمقابل قالع البوب

علي ابكد ماترف حاقد على النار

اشلون اتجوي بخدود التنانير

قالع باب خيبر بس ترف حيل

الفراشه اعله جتفه اتنام وتطير

البلابل من يسولف تصفن اعليه

وعلي اول واحد اتحبه العصافير

علي الماي اليشرب الماي للماي

وعلي الماي الترس حلك النواعير

علي اعكال وحجاب وعفه واخلاق

علي ادري اهواي وشويه التعابير

مثل انسان نلكه اليوم موجود

قصدي انسان في هيئة سياسي

بيام الدعايه اتكول ابو اتراب

ابزهده ايكسر الرقم القياسي

ابفطارية كلبنه ايفوز ويروح

ويدوس احلامنه ابرجل الكراسي

علي العاشر الفقره ورافك العوز

ولحد مامات صاحب خبز الشعير

علي الطلك الدنيه وشاهدي اوياي

لهسه اتبوس ابرجله الدنانير

علي الفرحه البقت بعيون الايام

وردت روح لوجوه التصاوير

علي ايقدس الدم ويكره الثار

مثل مايوسف اشكد يكره البير

امس موهوه حارب همه جبروا

علي ضد العنف ويموت عالخير

يطب للمعركه ويوزع ادروس

وعلى الشردوا علي ايوزع تحاضير

شعار ايردده لليوم ابوحسين

يموت السيف ويعيش الطباشير

يموت السيف موجي يكره السيف

يحب السيف بس ضد الخليفه

الخليفه اليكطع اركاب المساكين

ويكص اجفوفنه العاشت شريفه

علي لو هسه فايز بنتخابات

والعباس يكعدله بصريفه